Ýurdumyzyň suw baýlyklaryny netijeli peýdalanmak döwrüň talabydyr
Häzirki döwürde ýurdumyzyň suw baýlyklary derýalaryň hem-de ýerüsti we ýerasty suwlardan, suwarymly meýdanlarda emele gelýän zeý we sil suwlaryndan ybaratdyr. Türkmenistanyň Suw kodeksinde suw baýlyklarymyzy toplumlaýyn peýdalanmagyň tertibi beýan edilýär. Şu nukdaýnazardan, zeý suwlaryny oba hojalyk maksatlary üçin peýdalanmak şu günki günüň wajyp meselesidir. Suwarymly ekerançylykda ösdürilip ýetişdirilýän ekinlere berilýän mineral dökünleriň ujypsyzja bölegi toprakdan süzülip, zeýkeşlerden çykýar. Ylmy çaklamalara görä, zeýkeş suwlarynyň düzümindäki bar bolan iýmit maddalaryny mikrosuwotulary ösdürip ýetişdirmekde peýdalanyp bolar. Mikrosuwotular bolsa, bioenergiýany öndürmekde ygtybarly çig mal serişdesi bolup hyzmat edýär. Mikrosuwotulary zeýkeş suwlarynda ösdürmegiň artykmaçlygy onuň azyk howpsuzlygyna zyýan ýetirmeýändigi, beýleki ösümliklerden 15 – 20 esse tiz köpelýändigi, gaty gabygynyň ýokdugy sebäpli gaýtadan işlemegiň arzan düşýändigi, daşky gurşawa zyýanly täsir etmeýändigi bilen düşündirilýär. Zeýkeş suwlarynda energetiki maksatly mikrosuwotulary ösdürip ýetişdirmek ýurdumyzyň ykdysady we ekologiýa bähbitlerine laýyk gelýär. Bu bolsa ýurdumyzda durnukly ösüşiň berkarar bolmagyna ýardam edýär.