Ezber okuwçylar bäsleşdiler
Golaýda welaýat Baş bilim müdirligi bilen TMÝG-niň welaýat geňeşiniň bilelikde yglan etmeginde, şäheriň daşary ýurt dillerine ýöriteleşdirilen 28-nji orta mekdebinde Halkara Bitaraplyk güni mynasybetli welaýatyň ýöriteleşdirilen mekdepleriniň arasynda 12 ugur boýunça döredijilik bäsleşikleri geçirildi. Bäsleşigiň şertlerine laýyklykda okuwçylar goşgy düzmek, hekaýa ýazmak, diwar gazetlerini, türkmen milli tagamlaryny taýýarlamak hem wasp etmek, daşary ýurt dillerinde diktant ýazmak, goşgy aýtmak we täzeçe oýlap tapan taslama işleri boýunça bäsleşdiler. Juda çekeleşikli geçen bu bäsleşikde Türkmenistanyň Goranmak ministrliginiň Alp Arslan adyndaky Ýöriteleşdirilen harby mekdebiniň harby okuwçylary hem üstünlikli çykyş etdiler. Bäsleşigiň netijelerine laýyklykda, bäsleşigiň «Dil bilen dünýäni gezer» atly daşary ýurt dillerinde türkmen Bitaraplygyny çeper wasp etmek ugry boýunça harby okuwçy Mergen Atabalow 3-nji orna, «Ýaş fizik» atly ylmy döredijilik ugry boýunça Şatlyk Nazarow hem şeýle üstünlige mynasyp boldy. Harby okuwçylarymyzyň bäsleşiklerde gazanýan üstünlikleri olaryň maksada okgunlylygyny, Watany goramaga bolan höweslerini, ata Watanymyza bolan söýgülerini has hem artdyrdy.