Sahawatly aýyň nury
Haýyr — bereket Gündogarda belli bolan «Ajaýyplyklaryň düri» atly kitapda: «Her kim bir mömine don berse, ony geýen musulman bolsa, namaz-orazanyň haýryndan ol bendä Haktagala näçe köp sogap berse, don berene hem tä ol tozup ýok bolýança, şonça sogap berer. Her kim mömine tagam berse, ol bende ol tagamyň kuwwaty gidýänçä tagat etse, Haktagala ol bendä näçe sogap berse, tagam berene-de şol sogaby berer» diýip ýazylypdyr. Gadymy kitapda beýan edilişi ýaly, asyrlaryň dowamynda kemala gelen adamzat durmuşyny düzgünleşdirýän, medeniýetleşdirýän ýörelgeleriň biri-de haýyr-sahawatlylyk ýörelgeleridir. «Haýyr — bereket, nur — rehnet» diýýän dana halkymyz haýyr-sahawatlylygyň düýp özenini hoşniýetli gatnaşykda, birek-birege ynanyşmakda, mätäje goldaw, ýakyn-ýada hemaýat bermekde görüpdir. Pederlerimiziň bu asylly däbi häzirki wagtda-da mynasyp dowam etdirilýär. Hormatly Prezidentimiziň alyp barýan daşary hem içeri syýasaty hut şu ýörelgelere esaslanýar. Biziň ruhy ýörelgelerimiz, ilki bilen, agzybirlikde, jebislikde jemlenendir. Çünki agzybirlik — türkmeniň baş ýörelgesi. Dünýä halklary biziň agzybirlik ýörelgämize, onuň başynda duran eziz Arkadagymyza uly hormat goýýar. Sebäbi milli Liderimiziň her bir amala aşyrýan döwletli işiniň aňyrsynda halkyň bähbidi, adamzadyň abadan durmuşy dur.
