Gaýyn-gelin hormaty — maşgalanyň gymmaty
Halkymyzda gyzyň ýedi enesiniň biri hasap edilýän gaýynene hakynda aýdylan nakyllar, atalar sözleri diýseň kän. «Gaýyn-gelin gapakly gazan», «Gaýynatam ganarym, dolup durar dulumda, gaýynenem gazanym, getirip goýar ýanymda» ýaly nakyllar gelniň gaýynlaryna bolan mährem gatnaşygyny, hormat-sarpasyny, pikir-garaýşyny kemsiz suratlandyrýar. Gaýynene — gelniň ýanýoldaşynyň ejesi. Şunuň özi-de gaýynenäniň gelin üçin gymmatyny hem derejesini kemsiz kesgitleýär. Zenanyň özüne Alla tarapyn berlen, ýeke-täk özüne degişli bolan ykbaly kimdir biri bilen paýlaşmagy niýet edinmegi özüni, şu gününi we geljegini şol ynsana doly tabşyrmagy diýmekdir. Şeýle netijä gelmegiň aňyrsynda öz saýlan ynsany bilen maşgala gurup, iki göwre bir ýürek bolup, agzybir ýaşamak, bir-biregi söýüp-sylamak, bir-birege düşünmek, şat we gamly güni bile başdan geçirip, el-ele berip, diňe öňe hereket etmek, perzent ýetişdirip, ony ene-atasyna, il-gününe mynasyp adam edip ýetişdirmek ýaly päk hem asylly maksatlar durýar. Elbetde, bu belent maksatlary kemally amal etmek üçin ýaş çatynjalara olary gurşap alýan jemgyýetdäki ýaşy has uly, tejribesi ýetik adamlaryň hem kömek-goldawy zerur bolup durýar. Kömege ýetişmeli şol adamlaryň iň esasylarynyň biri-de, gelniň gaýynenesidir.
