Garaşsyzlyk ata-babalarymyzyň özbaşdak döwletli bolmak baradaky arzuwlarynyň amala aşmagyna, dünýä döwletleri bilen dostlukly gatnaşmaga mümkinçilik berdi. Şanly Garaşsyzlygymyzyň 30 ýylynyň içinde agzybir halkymyzyň asuda, abadan, erkin hem-de bolelin durmuşda ýaşamagyna, döretmegine, milli ýol-ýörelgelerimizi, däp-dessurlarymyzy gorap saklamaga, dünýä ýaýmaga giň ýol açyldy. Jemgyýetimiziň syýasy, ykdysady we medeni durmuşy has-da ýokary göterildi. Berkarar döwletimiziň bagtyýarlyk döwründe bedew bady bilen öňe barýan ýurdumyzda medeniýetde, sungatda, ylym-bilimde, sportda dünýä nusgalyk beýik işler amala aşyrylýar. Ak mermerden gurulýan ýaşaýyş jaýlary, saglygy goraýyş we beýleki medeni-durmuş desgalary kämil enjamlar bilen enjamlaşdyrylýar.
Agzybir halkymyz toýlary-toýa, baýramlary-baýrama ulaşýan Diýarymyzda Garaşsyzlygyň 30 ýyllyk şanly senesini abadançylygyň we gülläp ösüşiň nyşany hökmünde uly dabaralar, şatlyk-şowhun bilen belläp geçer. Çünki, Garaşsyzlyk bize asudalygy, abadan durmuşy peşgeş berdi. Garaşsyzlyk biziň ýurdumyza halkara gatnaşyklarynyň doly hukukly agzasy hökmünde öz syýasy garaýşyny beýan etmäge giň mümkinçilikleri döretdi.
