Alty ganat ak öýde aga-ýana ýaýnap ýatan Erkin baý kemsiz ýetişen görkana gyzyny mynasyp ýere durmuşa çykarmagyň pikirini edýärdi. Ol birsalym ojakdaky ojar oduna gaýnap duran mis tüňçäniň lakyrdysyny gözüni süzüp diňledi. Birdenem onuň aladaly ýüzüne şatlyk nury çaýyldy. Şol günüň ertesi obalara ýaň salýan jarçynyň sesi hemmeleri haýran galdyrdy:
— Halaýyk, eşitdim, eşitmedim diýmäň, how! Erkin baý gaýnaýan suwuň näme diýýänini düşündiren, ýüňü ýeten goç ýigide galam gaşly, hünji dişli, akyl-huşly, güler ýüzli, şirin sözli Gülaýym atly gyzyny nikalap berip, ýedi günläp toý tutjakdyr-la, how! Gerçek goç ýigitler! Erkin baýyň paýhas synagyndan geçmäge howlugyň how! Gaýnaýan suwuň diline düşünip, manysyny tiriň, how! Munuň üçin jöwher paýhas gerekdir-le, how!
