Berkarar Watanymyzda Milli Liderimiziň hem-de Hormatly Belent Serkerdebaşymyzyň taýsyz tagallalary netijesinde döwletimiziň gümrük edaralarynyň maddy-enjamlaýyn binýady has-da pugtalandyrylýar. Täze gurulýan hem-de düýpli durky täzelenýän gümrük nokatlaryna döwrebap barlag enjamlary, sanly ulgamyň mümkinçilikleri giňden ornaşdyrylýar. Munuň özi ýurdumyzyň ykdysady howpsuzlygyny üpjün etmäge hem-de gümrük işini halkara derejelerine laýyklykda amala aşyrmaga uly mümkinçilik bolup durýar.
Soňky ýyllarda ýurdumyzyň gümrük edaralarynyň täze binalaryny gurmak, olaryň durkuny täzelemek hem-de harby gullukçylary döwrebap gulluk ýaşaýyş jaýlary bilen üpjün etmäge uly ähmiýet berilýär. «Pähim-paýhas ummany Magtymguly Pyragy» ýylynyň ilkinji günlerinde ýurdumyzyň Lebap welaýat gümrükhanasynyň harby gullukçylary üçin niýetlenilen ýaşaýyş jaýynyň açylmagy hem-de bu dabarada ýurdumyzyň serhetýaka gümrük nokatlaryna dürli görnüşli gulluk awtoulaglarynyň sowgat berilmegi aýratyn bellärliklidir. Ýakynda Balkan welaýat gümrükhanasynyň harby gullukçylary üçin niýetlenilip, Türkmenbaşy şäherinde gurlan gulluk ýaşaýyş jaýynyň açylyş pursadyna hem şaýat bolduk. Häzirki wagtda Türkmenistanyň Döwlet gümrük gullugynyň ençeme gümrük nokatlarynyň düýpli durkuny täzelemek hem-de döwrebap barlag-rentgen enjamlaryny ornaşdyrmak işleri ýokary derejede alnyp barylýar. Munuň özi geljekde ýurdumyzyň gümrük edaralarynda alnyp barylýan işleri has-da kämilleşdirmäge, gümrük işlerini halkara derejesinde alyp barmaga we ýurdumyzyň söwda-haryt dolanyşygyny has-da ýokarlandyrmaga uly itergi berer.