Milli jemgyýetimiziň syýasy-hukuk esaslarynyň durmuşa ukyply, il bähbitli, döwlet ähmiýetli ösüş ýollarynyň täze wezipelerini kesgitlemekde we halkyň ynam bildirýän wekilleri bilen maslahatlaşyp, geňeşip, möhüm çözgütleri kabul etmekde Türkmenistanyň Halk Maslahatynyň aýratyn möhüm orny bardyr.
Halk Maslahaty Garaşsyzlyk ýyllarynda döwlet bilen jemgyýetçiligiň arasynda hyzmatdaşlygyň, jemgyýetiň jebisliginiň berk köprüsine öwrüldi. Döwletimiziň ösüşiniň iň möhüm wezipeleri, jemgyýetçilik durmuşynyň döwrüň talaplaryna görä özgerdilmeginiň ugur-ýollary baradaky anyk çözgütleri kabul etmegiň münberine öwrülen Halk Maslahatynyň mejlislerine gatnaşýan ýaşulular, ýaşlar, jemgyýetiň dürli gatlaklaryna wekilçilik edýän adamlar berkarar döwletiň ösüş ýollarynyň täze wezipelerine çuň düşünmek bilen, olary ýerine ýetirmegiň jogapkärçiligini ýürekden duýup, halkyň bagtyýar durmuşyny üpjün etmekde, nesilleriň ygtybarly geljeginiň berk binýadyny döretmekde döwletimiziň mümkinçilikleriniň uludygyna göz ýetirýärler we halkyň durmuşynyň aýrylmaz bölegine öwrülen bu forumyň ýüze çykarýan täzeliklerini, bu ýerde öňe sürülýän başlangyçlary, öňde goýlan wezipeleri halkyň arasynda giňden düşündirmekde işjeňlik görkezýärler. Türkmenistanyň Halk Maslahaty halkyň wekilçiliginiň, isleg-arzuwlarynyň, watançylyk başlangyçlarynyň ýüze çykýan ýeri hökmünde uly abraýa we ynama eýe boldy. Halk Maslahaty halkyň eziz Watanymyzyň gülläp ösüşlerine dahyllylygynyň, jemgyýetiň milli demokratik ýörelgeleriň il bähbitli many-mazmunyna çuňňur düşünmeginiň we her bir ösüş maksatlaryny bagtyýarlygyň, ynamly ýaşaýşyň egsilmez çeşmesi hökmünde kabul etmeginiň ruhlandyryjy daýanjydyr.
