Berkarar döwletiň täze eýýamynyň Galkynyşy döwründe hoşniýetli gatnaşyklar barha ösdürilýär. Şol sanda Hazarýaka döwletleri bilen hoşniýetli gatnaşyklar yzygiderli dowam etdirilýär. Biz muňa ýurdumyzda ýokary derejede geçirilen altynjy Hazar sammitinde aýdyň göz ýetirdik. Hormatly Prezidentimiz Serdar Berdimuhamedowyň başlyklygynda geçirilen altynjy Hazar sammiti netijeliligi bilen aýratyn bellenmäge mynasypdyr. Munuň özi Hazarýaka döwletleriniň dost-doganlyk gatnaşyklarynyň has-da ösdürilýändigini aýdyň beýan edýär.
Mälim bolşy ýaly, altynjy Hazar sammitinde möhüm meseleler boýunça özara düşünişmek gazanyldy. Hazar deňzi sebiti boýunça goňşy döwletler bilen hyzmatdaşlyga ýurdumyzyň daşary syýasy strategiýasynda aýratyn ähmiýet berilýär. Ýurdumyz «Açyk gapylar» hem-de giň halkara hyzmatdaşlyk syýasatyny üstünlikli durmuşa geçirmek bilen, oňyn bitaraplyk we beýleki döwletleriň içerki işlerine goşulyşmazlyk ýörelgelerine berk eýerýär, häzirki döwrüň wajyp meselelerini, şol sanda Hazar deňzi bilen bagly meseleleri çözmekde işjeň orny eýeleýär. Hazarýaka döwletleriniň hoşniýetli gatnaşyklary söwda-ykdysady, ekologiýa boýunça aýratyn bellenmäge mynasypdyr. Köp ýyllaryň dowamynda bu ugurlar boýunça netijeli işler alnyp baryldy. Bu ugurlarda hyzmatdaşlygy ösdürmekde Türkmenistanyň başlangyçlary, durmuşa geçirýän işleri aýratyn ähmiýetli bolup durýar.