Hormatly Prezidentimiziň parasatly baştutanlygynda Garaşsyz, baky Bitarap Türkmenistanyň dünýä ýurtlary, şol sanda goňşy döwletler bilen dostlukly gatnaşyklary yzygiderli berkidilýär. Arkadagly Serdarymyzyň golaýda Russiýa Federasiýasyna hem-de Eýran Yslam Respublikasyna üstünlikli amala aşyran resmi saparlary hem munuň aýdyň mysallary boldy. Hormatly Prezidentimiziň döwlet Baştutany wezipesine girişenden soňra ilkinji resmi saparyny Russiýa Federasiýasyndan başlamagy, saparyň çäklerinde Arkadagly Serdarymyza Russiýa Federasiýasynyň Prezidenti Wladimir Putin tarapyndan bu ýurduň ýokary döwlet sylagynyň — «Dostluk» ordeniniň gowşurylmagy gatnaşyklaryň köpýyllyk taryhy tejribesine, deňhukuklylyga hem-de özara bähbitlilige, dostluga esaslanýan netijeli hyzmatdaşlyga örän uly ähmiýet berilýändigini nobatdaky gezek äşgär etdi.
Rus Lideriniň nygtaýşy ýaly, hormatly Prezidentimiz Serdar Berdimuhamedow bu sylaga döwlet Baştutanlygyna saýlanmagyndan ozal hem, dürli wezipelerde işlän döwürlerinden bäri iki ýurduň arasynda strategik hyzmatdaşlygyň pugtalandyrylmagyna goşan uly şahsy goşandy üçin mynasyp boldy. Hormatly Prezidentimiziň: «Goý, bu ýokary sylag türkmen-rus strategik hyzmatdaşlygynyň, ýurtlarymyzyň we döwletlerimiziň dostlugynyň, hoşniýetli goňşuçylygynyň hem-de hyzmatdaşlygynyň mizemezliginiň ýene-de bir nyşany bolsun!» diýen sözleri halkymyzyň Arkadagly Serdarymyza bolan guwanjyny hem buýsanjyny has-da artdyrdy.