Şu gün, 2-nji aprelde Türkmenistanyň Magtymguly adyndaky milli sazly drama teatrynda hormatly Prezidentimiz Serdar Berdimuhamedowyň «Pähim-paýhas ummany Magtymguly Pyragy» ýylynyň baharynda halkymyza serpaý eden «Änew — müňýyllyklardan gözbaş alýan medeniýet» atly täze kitabynyň tanyşdyrylyş dabarasy bolup geçdi. Hormatly Prezidentimiziň halkymyzy ýene bir ajaýyp eseri bilen serpaýlamagy il-ulsumyzyň begenjini, buýsanjyny goşalandyrdy. Arkadagly Gahryman Serdarymyzyň bu kitaby gadymy Änew şäheriniň binagärlik medeniýetiniň, çeperçilik däpleriniň, beýik şahsyýetleriň ýaşan, döreden, guran gadymy Änew topragyndaky edebi, taryhy gymmatlyklarynyň giň beýanynyň jemidir. Kitabyň sahypalary taryh, durmuş, geçmiş we geljek baradaky suratlar bilen bezelen.
Tanyşdyrylyş dabarasynda edilen çykyşlarda täze kitabyň üç dilde neşir edilmeginiň daşary ýurtly raýatlaryň hem Änew şäheriniň taryhy we medeni gymmatlyklary, Berkarar döwletiň täze eýýamynyň Galkynyş döwründäki ösüşli ýollary bilen tanyşmaklaryna giň mümkinçilik döretjekdigi barada-da aýdyldy.
