Gazma taýak (Hekaýat)
Keýmir serdaryň ýedi sany ogly bolupdyr. Serdar ogullarynyň mert, edenli, ugurtapyjy adamlar bolup ýetişmekleri üçin mal-gara seretmegi, at çapmagy, yz çalmagy ýaşlykdan öwredipdir. Bir gün kiçi ogly ýaş taýa baş öwretmekçi bolanda, atdan ýykylyp, aýagyny agyrdypdyr. Öýde o ýerini, bu ýerini tutup, gaşyny çytybrak, burlup oturan ogluny görse-de, Keýmir serdar oňa ähmiýet bermändir. Özleriniň halyndan atalarynyň habar almaýşy ogullaryny geň galdyrypdyr. Ejeleri bu ýagdaýa näme diýjegini bilmändir. Ahyrsoňy çydaman: — Kakasy, ogluň-a dert çekip otyr. Sen welin «Näme boldy?» diýibem soraňok. Seniň bu parhsyzlygyňa men-ä hiç düşünip bilemok — diýipdir.
