Daşky gurşawyň gyzmagyna uýgunlaşmadyk bedende, ýylylyk çalyşma (termoregulýasiýa) hadysasynyň bozulmagy netijesinde, dürli agyrlyk derejesinde Gün urmasy döräp bilýär. Şeýle patologik ýagdaý yssy howaly ýurtlaryň adamlarynda, aýratyn-da, meýdan şertlerinde gulluk edýän harby gullukçylaryň arasynda ýygy-ýygydan duş gelýär.
Yssy howanyň täsirinde açyk meýdan şertlerinde we daglyk, çöllük ýerlerde ýokary fiziki işjeňlik ýagdaýynda çendenaşa derlemek, beýik ýerlere çykylanda dem alşyň ýygylaşmagy bedende suwuklygyň köp mukdarda ýitirilmegine getirýär.
