Düýn Ak bugdaý etrabynyň Nowruz ýaýlasyny şatlyk-şowhun gurşap aldy. Ýaşyl begrese beslenen bu gözel künjekde Änew şäheriniň 2024-nji ýylda «Türki dünýäsiniň medeni paýtagty» diýlip yglan edilmegi mynasybetli geçiriljek çärelere badalga bermek bilen bagly dabara ýaýbaňlandyryldy.
Dabara gatnaşyjy türki dilli döwletleriň wekilleri we beýleki hormatly myhmanlar toý keşpli ýaýlada giň gerim berlen baý many-mazmunly tomaşalary synladylar. Umumadamzat medeni genji-hazynasynyň aýrylmaz bölegine öwrülen halkymyzyň baý medeni mirasyny, daýhançylyk däplerini, oba zähmetkeşleriniň ýaz aladalaryny we çarwa durmuşyny açyp görkezýän tomaşalar, belent watançylyk duýgusyna beslenen milli aýdymlardyr sazlar, beýleki milli öwüşginli tomaşalar hemmelerde göwün göteriji duýgyny döretdi.
