Halkara zenanlar güni mynasybetli welaýatymyzda geçirilýän dabaralar egsilmez joşguna beslenýär. Änew şäherindäki «Bagt ýyldyzy» toý mekanynda gelin-gyzlarymyzyň, mährem enelerimiziň şanyna toýlanýan senä bagyşlanyp geçirilen dabara has-da täsirli boldy.
Welaýat häkimligi, Medeniýet müdirligi we jemgyýetçilik guramalary tarapyndan bilelikde guralan baýramçylyk dabarasyna welaýatymyzyň ähli ýerlerinden dürli kärlerde zähmet çekýän öňdebaryjy zenanlar, mährem eneler gatnaşdylar. Naz-nygmatly toý suprasynyň başyna jem bolan bagtdan paýly ildeşlerimiz beýik, taryhy döwrümiz, eşretli günlerimiz, ýurdumyzyň okgunly ösüşleri dogrusynda söhbet etdiler. Berkarar Watanymyzda zenanlara goýulýan hormat-sarpa hakdaky gürrüň olaryň söhbediniň özenini düzdi.
