Dil gülzarlygynyň şeýdasy
Uly halypa bilen tanyşlyk Haýdar mugallym bilen ilki tanyşlygymy hemişe ýylgyryp ýatlaýaryn. Ýaňy bir Magtymguly adyndaky Türkmen döwlet uniwersitetine okuwa giräýen wagtlarymdy. Öň onuň bilen gaýybana tanyşlygym bolsa-da («Ogullaryma pent» atly makalalar toplumyny «Nesil» gazetinde birini sypdyrman okap çykypdym), ussady ne ýakyndan, ne telewizorda görüpdim. Şonuň üçinem okuwa başlaýan wagtlarymyz mugallymlarymyzyň ikisi bilen baglanyşyklylykda: «Uly Haýdar», «Kiçi Haýdar» diýilmegi ünsümi özüne çekipdi. Ýöne şonda-da gürrüňiň Haýdar Muhyýew baradadygyny kelläme-de getirmändim. Hünärimiz žurnalistika bolansoň, Haýdarlaryň ulusy-da, kiçisi-de bize entek sapak berenokdy. Ýöne fakultetimiziň dilçidir edebiýatçy toparlaryny welin ol mugallymlaryň ikisi-de okadyp ýördi. Şonuň üçinem gürrüňden gürrüň çykdy-da, olaryň ikisini-de entek tanamaýandygym barada dilçi ýyldaşlarymyzyň biriniň ýanynda gürrüň etdim. Olam edil şol pursat: «Hana, kiçi Haýdar-a gelýär» diýip, öňümizden gelýäne ümledi. Ol gelýän şol wagtlar ýaňy bir uniwersitetde mugallym bolup işe galan, ýaş mugallym Haýdarguly Muhammetgulyýew ekeni. Onuň bilen durmuşyň soňraky ýollarynda, dürli öwrümlerde kän gabatlaşmak, işleşmek miýesser etdi. Şol gezek welin gapdalymyzdan salamlaşyp ge
