Buýsanja beslenýän şanly wakalar
Täze ýylyň bosagasynda bagtyýar halkymyzyň şatlygyna şatlyk, buýsanjyna buýsanç goşýan şanly wakalar bir-birine ulaşýar. 25-nji dekabrda hormatly Prezidentimiz Serdar Berdimuhamedowyň sanly ulgam arkaly geçiren iş maslahatynyň barşynda hem şeýle buýsançly wakalaryň şaýady bolduk. Iş maslahatynyň başynda döwlet Baştutanymyz oňa gatnaşyjylara we ähli watandaşlarymyza ýüzlenip, bagtyýar ýaşlar ýylynda hem zehinli ýaşlarymyzyň ata Watanymyzyň ösüşine mynasyp goşant goşýandyklaryny belledi. «Ýaşlaryň gazanýan üstünlikleri bizi örän guwandyrýar. Ýakynda «Ýaşlar – Watanyň daýanjy» atly kitabym çapdan çykdy. Onda ýurdumyzyň ýaşlarynyň häzirki döwürde ýeten sepgitleriniň, gazanan üstünlikleriniň jemi jemlenýär» diýip, hormatly Prezidentimiz sözüni dowam etdi hem-de bu kitabyň ýaşlar ýylynyň jemlerine bagyşlanyp, 27-nji dekabrda geçiriljek halkara ylmy-amaly maslahata we sergä sowgat boljakdygyny nygtady. «Bu kitabyň ilkinji sanyny türkmen halkynyň Milli Lideri Gahryman Arkadagymyza sowgat hökmünde iberýärin» diýip, Arkadagly Gahryman Serdarymyz aýtdy. Elbetde, şeýle ajaýyp kitabyň çap edilmeginiň tutuş halkymyzy begendiren şanly wakalaryň hatarynda naýbaşy orna eýedigini buýsanç bilen bellemek bolar.