At — türkmeniň ganaty
22-nji martda, sport we döredijilik işleri bilen meşgullanmak ýaly asylly endikleri bilen ildeşlerimize görelde bolýan milli Liderimize ady rowaýata öwrülen Akhan atly bedewiň ilkinji at taýynyň dünýä inendigi barada buşlanyldy. Bu hoş habar Gahryman Arkadagymyzyň başlangyjy esasynda BMG-niň Baş Assambleýasynyň Kararnamasy bilen yglan edilen «2021-nji ýyl — Halkara parahatçylyk we ynanyşmak ýyly» mynasybetli ýurdumyzda we dünýäde geçirilýän halkara derejeli çäreler bilen sazlaşykly utgaşdy. Çünki taryhyň ähli döwürlerinde türkmen bedewleri ösüşleri we täzeçillikleri Beýik Ýüpek ýolunyň ugry bilen dünýäniň çar künjüne ýetiripdirler. Hut şonuň üçin hem dünýäde parahatçylygyň, düşünişmegiň, gepleşikleri geçirmegiň medeniýetini we öňüni alyş diplomatiýasyny ösdürmekde milli Liderimiziň alyp barýan işlerinde ahalteke bedewlerimiz simwoliki mana eýedir. Alym Arkadagymyz milli atşynaslyk ulgamynda täze doglan at taýyna at dakylanda, onuň atasynyň ady bilen utgaşdyrmak däbine eýerip, Akhanyň adynyň birinji harpyna laýyklykda we ak mermerli paýtagtymyzyň esaslandyrylmagynyň 140 ýyllygynyň hormatyna Aşgabat diýip at goýdy.
