Ozaldan habar berlişi ýaly, Türkmen halkynyň Milli Lideri Gahryman Arkadagymyzyň Birleşen Arap Emirliklerine resmi sapary dowam edýär. Şu gün Milli Liderimiz BAE-niň Prezidenti Şeýh Muhammed bin Zaýed Al-Nahaýýan bilen ýokary derejede gepleşikleri geçirdi. Gepleşiklerde iki döwletiň ozaldan gelýän ylalaşyklarynyň netijesinde alnyp barylýan işler şeýle-de geljekki bilelikde durmuşa geçiriljek maksatlar ara alnyp maslahatlaşyldy.
Duşuşygyň barşynda Gahryman Arkadagymyz: «Birleşen Arap Emirlikleri biziň dostumyzdyr, ygtybarly ykdysady we söwda hyzmatdaşymyzdyr. Häzirki döwrüň köp sanly örän möhüm soraglaryny çözmekde pikirdeşimizdir» diýip belledi. BAE-niň Prezidenti öz gezeginde Türkmenistanyň Halk Maslahatynyň Başlygynyň şu gezekki resmi saparynyň uly ähmiýetini bellemek bilen, Türkmenistan bilen Birleşen Arap Emirlikleriniň arasyndaky hyzmatdaşlygyň elmydama netijeli häsiýete eýe bolýandygyny aýtdy.
