ýurdumyza bildirilen uly ynamyň nyşanydyr
Golaýda Birleşen Milletler Guramasynyň ştab-kwartirasyndan ýurdumyza hoş habar gelip gowuşdy: Garaşsyz, baky Bitarap Türkmenistan BMG-niň Baş Assambleýasynyň 77-nji sessiýasynyň wise-başlyklygyna saýlanyldy. Türkmen diplomatiýasynyň bu täze üstünligine biz, ozaly bilen, dünýäniň geosyýasy giňişliginde «Türkmenistan» atly parlak ýyldyzyň has ýiti ýalkym saçmagy ugrunda irginsiz tagalla eden milli Liderimiz Gurbanguly Berdimuhamedowyň bitiren hyzmatlaryna, öňe süren halkara başlangyçlaryna çäksiz hormat-sarpanyň nyşany hökmünde buýsanmaga haklydyrys. Galyberse-de, munuň özi ýokary döwlet wezipesine girişmek dabarasynda: «Türkmenistan hoşniýetli goňşuçylyga, özara hormatlamaga we deňhukuklylyga, dünýäniň ähli ýurtlary bilen özara bähbitli hyzmatdaşlygy ýola goýmaga esaslanan Bitaraplyk syýasatyny dowam eder» diýip, ýurdumyzyň halkara gatnaşyklarda ozalky syýasy garaýyşlarynda galýandygyny tassyklan hormatly Prezidentimiz Serdar Berdimuhamedowyň saýlap alan ugruna bildirilen uly ynamyň aýdyň beýanydyr. Milletler Bileleşigi bilen gatnaşyklarda toplanan 30 ýyllyk tejribä, döwletimiziň daşary syýasatynda gazanylan üstünliklere ser salyp, ýurdumyzyň nobatdaky gezek hem bu jogapkärli wezipäni abraý bilen ýerine ýetirjekdigini şübhelenmän aýdyp bileris.