Garaşsyz, baky Bitarap Türkmenistanda zenanlar jemgyýeti pugtalandyrmakda möhüm güýje öwrüldi. Türkmen zenanlary öý-ojagyň eýesi, mähriban ene hökmünde kemally, ilhalar, zähmetsöýer perzentleri ösdürip ýetişdirmek bilen, ýurdumyzyň jemgyýetçilik-syýasy, durmuş-ykdysady, medeni-ynsanperwer ulgamlarynda, şeýle-de dostlukly döwletler bilen özara gatnaşyklarda ýokary işjeňlik görkezýärler. Bu hakykat şu ýylyň maý aýynda Gahryman Arkadagymyzyň başlangyjy esasynda, hormatly Prezidentimiziň goldawy bilen paýtagtymyz Aşgabatda üstünlikli geçirilen Merkezi Aziýa döwletleriniň we Russiýanyň zenanlarynyň dialogynda hem has aýdyňlygy bilen ýüze çykdy.
Hyzmatdaşlygyň täze görnüşi bolan zenanlaryň dialogy doganlyk döwletleriň arasyndaky özara gatnaşyklary giňeltmekde, gender syýasatynyň durmuşa geçirilmeginde uly ähmiýete eýedir. Hormatly Prezidentimiziň belleýşi ýaly, Merkezi Aziýa döwletleriniň we Russiýanyň zenanlarynyň dialogy diňe bir oňa gatnaşýan ýurtlaryň arasynda gatnaşyklary ösdürmäge däl, eýsem, tutuşlygyna bu ugurda halkara hyzmatdaşlygy pugtalandyrmaga täzeden itergi berdi. Aslynda, gender deňligini üpjün etmek Merkezi Aziýa ýurtlarynyň hem-de Russiýanyň syýasatynda möhüm ugurlaryň biri hasaplanýar. Gender syýasatyny, onuň maksatlaryny, wezipelerini we ýörelgelerini kesgitleýän milli hereketleriň meýilnamalary, täze kanunçylyk namalary kabul edilýär. Gender deňliginiň ilerledilmegi zenanlaryň döwlet gurluşynyň ähli ugurlarynda ukyp-başarnyklaryny açyp görkezmeklerine giň mümkinçilikleri döredýär.