Berkarar döwletimiziň bagtyýarlyk döwründe Gahryman Arkadagymyzyň ýolbaşçylygynda bize häli-şindi täze sepgitleriň şaýady bolmak bagty miýesser edýär. Biz ýakynda şeýle şöhratly wakalaryň ýene biriniň — hormatly Prezidentimiziň gatnaşmagynda Aşgabat — Türkmenabat ýokary tizlikli awtobanynyň Aşgabat — Tejen böleginiň açylyş dabarasynyň taryhy pursatlarynyň şaýady bolduk. Halkara derejesinde gurlan bu ýokary tizlikli awtobanyň milli hühärmenlerimiz, ýerli telekeçilerimiz tarapyndan gurulmagy bizi has-da buýsandyrýar. Şeýle-de milli Liderimiziň «Döwlet adam üçindir!» diýen baş şygary bilen alyp barýan tutumly işleriniň barha rowaçlanýandygyna şaýatlyk edýär.
Hormatly Prezidentimiziň hut özüniň başlangyjy bilen, ýurdumyzda Türkmenistanyň Senagatçylar we telekeçiler birleşmesi döredildi. Şeýlelikde, ýurdumyzy ykdysady taýdan belent derejelere ýetirmekde hususyýetçilik ulgamyna giň ýollar açyldy. Hususyýetçilik ulgamynyň uly mümkinçilikleri Diýarymyzyň belent ösüşlerine gönükdirildi. Şondan bäri geçilen gysga taryhy döwürde hususy telekeçilerimiz milli ykdysadyýetimiziň dürli ugurlarynda — gurluşykda, oba hojalygynda, senagatda we beýleki ugurlarda ägirt uly işleri amala aşyryp, ýurdumyzyň ösüşlerine özleriniň mynasyp goşantlaryny goşdular. Ine, bu gün bolsa ýerli telekeçilerimiz halkara derejesindäki Aşgabat — Türkmenabat ýokary tizlikli awtobanynyň Aşgabat — Tejen bölegini ulanyşa girizdiler. Nesip bolsa, sanlyja ýyllardan bu halkara derejesindäki Aşgabat — Türkmenabat ýokary tizlikli awtobanyň gurluşygy dolulygyna tamamlanylar. Şonuň netijesinde bolsa, hormatly Prezidentimiziň öňe sürýän Beýik Ýüpek ýoluny döwrebap derejede dikeldip, geografik taýdan amatly ýerleşýän ýurdumyzda adamzat bähbidine, hyzmatdaşlyga, ösüşe hyzmat etjek üstaşyr geçelgelerini amala aşyrmakda ägirt uly ähmiýete eýe bolar.