Magtymgulynyň eserleri — eýýamlara şamçyrag
Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda ata Watanymyz batly gadamlar bilen öňe barýar. Ähli ugurlar bilen bir hatarda, täze taryhy eýýamymyzda milli mirasymyzy düýpli öwrenmek hem-de ony dünýä ýaýmak işleri barha giň gerime eýe bolýar. Häzirki wagtda nusgawy edebiýatymyzyň görnükli söz ussatlary bilen birlikde, Magtymguly Pyragynyň edebi mirasyna hem ýokary baha berilýär. Onuň eserleri düýpli öwrenilip, giň okyjylar köpçüligine ýetirilýär. Berkarar döwletiň täze eýýamynyň Galkynyşy döwri Magtymguly Pyragynyň arzuwlan eýýamydyr. Täze taryhy zamanamyz Magtymguly Pyragynyň döredijilik mirasyna çuň düşünmäge, ony has-da içgin öwrenmäge şert döredýär. Beýik şahyryň dana setirleri asyrlaryň dowamynda öz wajyplygyny ýitirmän gelýär. Şahyryň şygyrlarynda milli ahlak-terbiýeçilik mekdebi köp asyrlaryň dowamynda kämilleşip gelen ýörelgeler bilen utgaşýar. Şeýle-de, şygyrlarda türkmeniň milli däp-dessurlary, salamlaşmak, hal-ahwal soraşmak, ata-eneňi gözüň göreji ýaly arzylamak, ulyny sylamak, kiçä hormat goýmak, myhmansöýerlik, lebzihalallyk, agzybirlik, akgöwünli, adalatly bolmak ýaly edep ýörelgeleri çuňňur pähim-parasata ýugrulyp kämilleşdirilipdir. Kämil nesli kemala getirmekde Magtymguly Pyragynyň baý edebi mirasy bahasyna ýetip bolmajak gymmatlykdyr.
