Hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwründe milli däp-dessurlarymyz täzeçe röwüşde, manyda has-da baýlaşdyrylýar. Mähriban halkymyz Gurban baýramynda guşgursak ak bugdaýyň unundan bişirilen gatlama, ýagly petir, çelpek, maýaly petir, pişme, owmaç, mesge petir ýaly dürli çörek we çörek önümlerini hem-de palaw, dograma, ýarma, çekdirme, gowurma ýaly milli tagamlary taýýarlap, datly desterhany giňden ýazyp, sadakalar berip, märekä hödür-kerem edýär. Aýat-töwürler okalyp, Gahryman Arkadagymyzyň, hormatly Prezidentimiziň ömürleriniň uzak bolmagy, il-ýurt ähmiýetli amala aşyrýan beýik işleriniň rowaç bolmagy, mähriban halkymyzyň abadançylygy dileg edilýär. Häzirki wagtda nesilleriň ruhy terbiýesiniň we köňül tämizliginiň gönezligi bolan milli däp-dessurlarymyzy gaýtadan dikeltmek, olary döwrebap röwüşde durmuşa ornaşdyrmak üçin uly aladalar edilýär. Şunda ýaş nesli milli däp-dessurlaryň esasynda terbiýelemek möhüm wezipe bolup durýar. Ynsany bezeýän ajaýyp häsiýetleriň biri hem onuň edebidir.
Ata-ene perzentlerini terbiýeli, süňňi halal, päk ahlakly, adamkärçilikli, Watana wepaly, zähmetsöýer, ar-namysly edip ýetişdirmek üçin uly alada edýär. Nusgawy edebiýatymyza ser salanymyzda, olaryň ençemesiniň öwüt-ündew äheňlidiginden çen tutsaň, munuň şeýledigine aňryýany bilen göz ýetirýärsiň. Ata-babalarymyzdan miras galan asylly däp-dessurlarymyz, gymmatlyklarymyz häzirki bagtyýar döwrümiziň buýsançly, gujurly, asylly ýaşlaryna ýol görkezijidir. Bu mukaddes ýörelgelerde sagdyn jemgyýetiň, kämil döwletiň, abadan ojagyň bitewüligi jemlenýär.
