26-njy aprelde «Aşgabat» kinoteatrynda paýtagtymyza Birleşen Milletler Guramasynyň Ýewropa ykdysady komissiýasynyň «Şäherlerdäki baglar» atly halkara güwänamasynyň gowşurylmagy mynasybetli «Bag-bossanly Aşgabadym» atly maslahat geçirildi. Oňa ýurdumyzyň medeniýet we sungat işgärleri, aýdymçylardyr bagşy-sazandalar, talyp ýaşlar hem-de köpçülikleýin habar beriş serişdeleriniň wekilleri gatnaşdylar.
Maslahatyň öň ýanynda guralan sergi çeperçilik sungatynyň köpöwüşginliligini açyp görkezdi. Ýygnananlar meşhur suratkeşleriň eserlerinden, keramika önümlerine siňdirilen sungat gözelliklerinden ruhy lezzet aldylar.
