Pyragynyň paýhasy — parahatlyk baýdagy
Ine-de, dünýäde ynsana täsir ediji iň uly güýjüň söze degişlidigini subut edýän ýene-de bir hakykat. Ylahy ylhamyň güýjünden şygra öwrülip, ýürekden ýürege ugran sözler, gör, neneňsi beýik işleri bitirmäge ukyply! 300 ýyl mundan ozal türkmeniň akyldar oglunyň welilik ukyby bilen dörän şygyrlar, bu gün parahatçylygyň ilçisi bolan ak kepderi mysaly ýurtdan-ýurda, sebitden-sebite aýlanýar. Her setirinde agzybirligi, parahatlygy, merdanalygy, ar-namysy, çäksiz wepany, ynsanperwerligi wagyz edýän ol dürdäne şygyrlar bu gün uly dünýä üçin örän wajyp, diýseň ähmiýetli. Türkmeniň nusgawy şahyrynyň kalp sözleri bu gün abraýly halkara guramalaryň belent münberinden ýaňlanýar. Özi-de jaý ýerinde, tüýs wagtynda ýaňlanýar. Şahyr üçin şygrynyň ähli adamzada derkarlygyndan uly bagt bolup bilermi?! Şygyrlary bilen şeýle bagta ýeten şahyra özüniň çyn şahyrlyk borjuny berjaý eden şahyr diýilýändir. Diýmek, Magtymguly Pyragy — eýýamlaryň, zamanlaryň iň bagtyýar şahyry! Çünki onuň ylahy şygyrlary öz mukaddes wezipesini abraý bilen ýerine ýetirip, dosty-dosta duşurýar, hemmeleri agzybirlige çagyrýar, kineleri bagyşlamagy ündeýär. Ýer ýüzüniň ähli halklaryny birleşdirýän parahat durmuş hakyndaky arzuw bu gün Pyragynyň setirleri bilen teswirlenýär. Mundan aňyrda niçik many, mundan ýokarda niçik dereje bolup biler?! «Halklar bir jebis maşgala...»
