Çagalar neşirleri hakynda
Çagalar üçin niýetlenen neşirleriň biri bolan žurnallar döredijilikli çemeleşmäniň, dürli oý-pikirleriň çeşmesi bolup, çagalara täze dost tapynmaga, okamak islegini döretmäge, bilimler dünýäsine aralaşmaga, özüni uly adamlar hökmünde duýmaga mümkinçilik berýär. Mundan başga-da, žurnallarda berilýän oýunlar we gyzykly maglumatlar çagalarda sabyrlylygy, zähmetsöýerligi terbiýeleýär. Olaryň pikirleniş ukybynyň ösmegine kömek edýär. Žurnallar belli bir ýaş aralygyndaky mekdep ýaşyna ýetmedik körpejeler üçin, çagalar we ýetginjekler üçin, gyzjagazlar we oglanjyklar üçin niýetlenilýär. Geliň, dünýäniň dürli ýurtlarynda çagalar üçin niýetlenilip, neşir edilýän žurnallar bilen tanşalyň! «Мурзилка» žurnaly 1924-nji ýyldan bäri Russiýa Federasiýasynda çap edilýär. Ol 6 ýaşdan 12 ýaşa çenli çagalar üçin niýetlenip, aýda bir gezek çap edilýän edebi-çeper žurnaldyr. Žurnalyň ady çaga eserleriniň ýazyjysy A.A.Fýodorow-Dawydowyň eserlerindäki gahryman – güjüjek Murzilkanyň lakamy bilen baglanyşykly. 2011-nji ýylda bu žurnal iň uzak wagt bäri çap edilýän çagalar neşiri hökmünde Ginnesiň Bütindünýä rekordlar kitabyna girizildi.
