«Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyna» laýyklykda, ýurdumyzda elektron resminamalaryň dolanyşygyny üpjün etmek, sanly aragatnaşygy has-da kämilleşdirip, elektron hyzmatlaryny ýerine ýetirmek boýunça giň gerimli işler alnyp barylýar. Şu nukdaýnazardan, ýurdumyzyň karz edaralary tarapyndan ilata edilýän sanly bank hyzmatlarynyň gerimini has-da giňeltmek, olaryň elýeterliligini üpjün etmek maksady bilen, täze görnüşli döwrebap sanly bank hyzmatlary yzygiderli müşderileriň hyzmatyna hödürlenilýär. Olaryň hatarynda «Internet bank» we «Mobil bank», «QR-cod», «Cash back» höweslendiriji hyzmaty, «Goýum bank karty», «Maşgala» bank karty, «Owerdraft» karz bank karty we başga-da birnäçe bank hyzmatlaryny görkezmek bolar. Bank kartlarynyň giň gerimde hereket etmegi döwrebap usullary ulanmak bilen pul-karz ulgamynyň işjeňligini ösdürmek arkaly pul dolanyşygynyň gerimini giňeltmeklige, goýum görnüşinde ilatdan çekilen erkin pul serişdelerini gaýtadan ýerleşdirip, ykdysady ösüşe oňyn täsirini ýetirmeklige we ýurduň içerki, halkara hasaplaşyklarynyň howpsuzlygynyň üpjün edilmegine, netijede bolsa, haryt-pul gatnaşyklarynyň ýeňilleşdirilmegine mümkinçilik berýär.
Ýurdumyzyň banklarynda sanly tehnologiýalaryň giňden ornaşdyrylmagy bilen, milli kart ulgamymyz boýunça döredilen mümkinçilikleriň käbir görnüşleri barada durup geçeliň.
