Her bir toý-baýramy zähmet üstünlikleri bilen garşylaýan halkymyz «Türkmenistan ― parahatçylygyň we ynanyşmagyň Watany» ýylynda giňden belleniljek Aşgabadyň 140 ýyllygyna, mukaddes Garaşsyzlygymyzyň şanly 30 ýyllygyna ýokary derejede taýýarlyk görýär.
Gözel paýtagtymyzyň günsaýyn özgerýän keşbi görenleri haýrana goýýar. Garaşsyzlyk ýyllarynyň içinde Aşgabat düýpli täze binagärlik keşbe eýe boldy. Hormatly Prezidentimiziň baştutanlygy bilen gysga döwrüň içinde şähergurluşyk-binagärlik maksatnamasy üstünlikli amala aşyrylyp, Aşgabatda medeni-durmuş maksatly desgalaryň birnäçesi gurlup, ulanylmaga berildi. Ak mermerli kaşaň binalary, al-elwan güllere bürenen seýilgähleri, ajaýyp suw çüwdürimleri bilen gözüňi dokundyrýan paýtagtymyz her bir türkmenistanlynyň buýsanjydyr.
