Hormatly Prezidentimiziň şähergurluşyk-binagärlik maksatnamasynyň üstünlikli berjaý edilmeginiň netijesinde gözel paýtagtymyz Aşgabat gysga wagtyň içinde dünýäniň iň gözel şäherleriniň birine öwrüldi. Merkezi Aziýanyň merjeni hökmünde giňden tanalýan baş şäherimiz gözel künjekleri — seýilgähleridir ak mermere beslenen binalary, medeni-durmuş maksatly täsin desgalary, ähli şertleri özünde jemleýän ýaşaýyş toplumlary bilen görenleri haýrana goýýar.
Aşgabadyň Olimpiýa şäherçesi, «Ylham», «Arkadag», «Aşgabat», «10 ýyl Abadançylyk», «Garaşsyzlyk» seýilgähleri, «Berkarar», «Bagtyýar», «Aşgabadyň ýalkymy» söwda-dynç alyş merkezleri, Janly tebigatyň milli muzeýi we beýleki birnäçe medeni-durmuş maksatly binalarymyz bu gün ähli halkymyzyň guwanjyna, paýtagtlylaryň we myhmanlarymyzyň höwes bilen dynç alýan ýerlerine öwrüldi. Hormatly Arkadagymyzyň taýsyz tagallasy bilen ak şäherimiziň çägi täze gurulýan ýaşaýyş toplumlarynyň, täsin desgalaryň hasabyna has-da giňeýär. Täze gurulýan «Altyn kölüň» kenaryndaky dynç alyş toplumy paýtagtymyzyň binagärlik keşbini has-da baýlaşdyrar. Mähriban halkymyz ýurdumyzyň ýüregi Aşgabady berkararlygyň, bagtyýarlygyň, gülläp ösüşleriň, döredijiligiň, döwletliligiň, aýdym-sazyň şäheri hasap edýär. Aşgabat — rowaçlyklaryň, ak arzuwlaryň, ýagşy umytlaryň şäheri. Gahryman Arkadagymyzyň parasatly baştutanlygynda mähriban halkymyz mukaddes Garaşsyzlygymyzyň 30 ýyllyk, Aşgabadyň esaslandyrylmagynyň 140 ýyllyk toý dabaralaryny uludan tutup, ýene-de birnäçe möhüm desgalaryň açylyş dabaralaryna şaýat bolýarlar. Toýlary toýlara ulaşýan mähriban ildeşlerimiz bu baýramçylyklara uly zähmet üstünlikleri bilen barmak üçin yhlasly zähmet çekýärler.
