Mallaryň saklanýan desgalarynyň çäkleri öz wagtynda ýanyjy zatlardan arassalanmalydyr. Mallar üçin taýýarlanan ot-iýmleri mallaryň çykarylýan ýollarynyň ugurlarynda ýa-da päsgel berjek ýerlerde goýmaklyk talaba laýyk däldir. Desgalaryň gapylary, derwezeleri diňe daş tarapa, desgadan çykylýan ugur boýunça açylmalydyr. Olaryň ätiýaçlyk gapylaryny islendik wagtda açmaga mümkinçilik bolmalydyr.
Mallaryň saklanýan ýerlerinde ýeňil ýanyjy suwuklyklaryň, maddalardyr jisimleriň saklanmagyna ýol berilmeli däldir. Ýangyn ýüze çykan ýagdaýynda mallaryň tiz wagtda boşadylmagyny we jaýdan çykarylmagyny üpjün etmek üçin süýt önümleri fermalarynda mallary toparlaýyn daňmak usulyny ulanmak zerurdyr. Bu ýerlerde elektrik simleri polat turbalaryň içinden geçirilen we ýagtylandyryjy çyralaryň daşlary gorag aýna örtükleri bilen ýapylan ýagdaýda bolmalydyr. Tok bölüji, öçüriji we beýleki enjamlar mallaryň saklanýan desgalarynyň daş ýüzünde diwarda oturdylmalydyr.
