Welaýat Taryhy we ülkäni öwreniş muzeýinde Ylymlar güni mynasybetli «Dünýäniň açary — ylym» atly dabaraly maslahat geçirildi. Türkmenistanyň Kärdeşler arkalaşyklarynyň welaýat birleşmesiniň guramagyndaky maslahata iri jemgyýetçilik guramalarynyň wekilleri, Türkmenabadyň lukmançylyk orta okuw mekdebiniň mugallymlarydyr talyplary gatnaşdylar.
Maslahatda ýurdumyzda ylym ulgamyny ösdürmekde we ylmy açyşlary alyp barmakda edilýän aladalar baradaky buýsançly sözler çykyşlaryň esasy özenini düzdi. Çykyş edenler berkarar Watanymyzyň ylym-bilimde gazanýan ösüşleri, täze innowasiýalardan kämil baş çykarýan hünärmenleri taýýarlamak ugrunda alnyp barylýan işler, şeýle hem alymlaryň ylmy gazananlaryny dünýä ýaýmak hem-de halkara hyzmatdaşlygyny pugtalandyrmak babatynda edilýän aladalar dogrusynda gürrüň etdiler.
