Gök pälwan
1948-nji ýylyň 5-nji iýulynda Garagum sährasynyň Aşgabat şäherinden 70 kilometr aradaşlykdaky Gysy obasynda çopan Hydyrguly Öweliýewiň we Gurbanjahan enäniň köp çagaly döwletli maşgalasynda saryýagyzja, gögümtil gözlüje oglan bäbejik dünýä inýär. Öweli aga türkmen halkynyň milli ýörelgesine eýerip, agtyjagynyň gulaklaryna azan-kamat aýtdyryp, bu dünýä aman geldi diýip, Amangeldi diýip at dakýar. Amangeldi doganlary Amandurdy we Amanberdi hem-de alty gyz uýasy bilen çarwa maşgalasynda terbiýelenip, kemala gelýär. Olar Garagum sährasynyň gujagynda ýerleşýän çarwa obasynda çarwaçylygyň ýol-ýörelgesini kemsiz ele alýarlar. Amangeldi ýumruk ýalylygyndan mal yzynda gezip, uzyn boýly, berdaşly we çeýe bedenli ýetginjek bolup ýetişýär. Ol öz deň-duşlary bilen türkmen sährasynyň Hydyr gören çägesiniň üstünde basalaşyp, göreş tutup taplanýar. Öweli aga çagalygyndan çarwaçylygyň daşyndan, türkmen milli göreşi bilen hem meşgullanypdyr. Toýlarda orta çykyp, Garagum sährasynda Öweli pälwan ady bilen adygypdyr. Ol agtygynyň öz kesbini dowam edýändigine begenip, oňa türkmen göreşiniň emelleriniň inçe syrlaryny we ýol-ýörelgelerini birkemsiz öwredýär. Agtygy hem ýaşlygyndan Garagum sährasynyň oýlaryndaky obalarda tutulýan toýlarda orta çykyp başlaýar we göreş meýdanyndan baýraksyz dolanmaýar. Amangeldi eýýäm on ýedi ýaşynda adygyp ugraýar hem-de diňe bir Garagum sährasyndaky däl, eýsem,