Berkarar döwletiň täze eýýamynyň Galkynyşy döwründe beýik akyldar we şahyr Magtymguly Pyragynyň hormat-sarpasy belent derejelere göterilip, şirin dilli söz ussadymyzyň ömrüni we döredijiligini, edebi mirasyny öwrenmek hem-de giňden wagyz etmek bilen bagly tagallalar barha rowaçlanýar. Arkadagly Gahryman Serdarymyz tarapyndan bu ugurdaky işleriň üstünlikli dowam etdirilmegi dünýäde beýik söz ussadymyzyň şahsyýetine we mirasyna gyzyklanmany has-da artdyrýar.
«Pähim-paýhas ummany Magtymguly Pyragy» ýylynda eziz Diýarymyzyň ähli künjeklerinde akyldar şahyrymyz Magtymguly Pyragynyň doglan gününiň 300 ýyllygy baý many-mazmunly çäreler bilen has-da dabaralandyrylýar. Munuň özi her birimiziň kalbymyzy joşa getirip, ýakymly duýgulary döredýär. Beýik söz ussadynyň paýhasly pikirleri diňe türkmen halkyna däl, tutuş adamzada hyzmat etmegiň nusgalyk mekdebi, ýolgörkeziji şamçyragy bolup durýar.