Berkarar döwletiň bagtyýarlyk döwründe aragatnaşyk ulgamyna dünýäniň iň soňky gazananlary, döwrebap, kämil tehnologiýalary ornaşdyrylýar. Häzirki wagtda ykdysadyýetiň ähli ulgamlaryna sanly tehnologiýalaryň işjeň ornaşdyrylmagy ýurdumyzyň halk hojalyk toplumyny mundan beýläk-de ösdürmegiň ileri tutulýan ugurlarynyň birine öwrüldi. Ýurdumyzyň ynsanperwer goňşuçylyk gatnaşyklaryna ýugrulan halkara hyzmatdaşlyklary netijesinde gazanylýan üstünlikler hem halkymyzyň abadan hem-de eşretli durmuşda ýaşamagy üçin alnyp barylýan işlere özboluşly goşant bolup, ýurdumyzyň halkara abraýynyň artmagynyň, halklar arasyndaky ygtybarly hyzmatdaşlygy berkitmegiň esasy ýoly hasaplanylýar. Hormatly Prezidentimiziň yzygiderli tagallalary esasynda türkmen-owgan gatnaşyklarynyň ösdürilmegi hem-de bu ugurda halkara hyzmatdaşlygynyň ýaýbaňlandyrylmagy bolsa ýurdumyzyň ösüşleriniň ygtybarly kepili bolup durýar.
Milli Liderimiziň syýasy-diplomatik, söwda-ykdysady we ynsanperwer syýasatlarynyň netijesinde Türkmenistan goňşy Owganystanda parahatçylygyň we gülläp ösüşiň dabaralanmagyna hemmetaraplaýyn goldaw berýär. 2020-nji ýylyň 30-njy sentýabrynda «Türkmenaragatnaşyk» agentligi bilen Owganystan Yslam Respublikasynyň Aragatnaşyk we maglumat tehnologiýalary ministrliginiň arasynda aragatnaşyk we maglumatlaşdyryş ulgamy boýunça hyzmatdaşlyk etmek hakyndaky Ähtnama, şeýle hem Ymamnazar — Akina hem-de Serhetabat — Turgundy halkara optiki-süýümli aragatnaşyk ulgamyny gurmak we üstaşyr akymlary geçirmek hakyndaky şertnama dabaraly ýagdaýda gol çekilmegi hem iki ýurduň goňşuçylyk gatnaşyklarynyň taryhynda möhüm waka boldy. Bu şertnama Ymamnazar — Akina hem-de Serhetabat — Turgundy halkara optiki-süýümli aragatnaşyk ulgamyny gurmak we üstaşyr akymlary geçirmek barada bolup, bu birikme Owganystanyň aragatnaşyk toruny halkalaýyn işletmäge, ýagny, Hyrat — Akina aralygynda birikdirmäge mümkinçilik döreder. Bu taslama geljekde birnäçe daşary döwletlere çykmaga hem-de aragatnaşyk ulgamynda hyzmatdaşlyklary artdyrmaga hem giň ýol açýar.
