Balkanabat şäherindäki «Türkmeniň ak öýi» binasynda Türkmenistanyň Bilim ministrliginiň, Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň bilelikde ýurdumyzyň umumybilim berýän mekdeplerinde, mekdepden daşary bilim edaralarynda hereket edýän haly gurnaklarynyň arasynda yglan eden «Iň gowy haly gurnagy» atly bäsleşiginiň welaýat tapgyry geçirildi.
Okuwçy gyzlarda zähmetsöýerligi, asylly gylyk-häsiýetleri terbiýelemegi we olara halyçylyk sungatynyň inçe syrlaryny öwretmegi maksat edinen bäsleşigiň şertlerine laýyklykda, oňa gatnaşanlar öz haly gurnaklaryny çeper sözleriň üsti bilen tanyşdyrdylar, däp-dessurlarymyzy goşgularda, aýdymlarda, rowaýatlarda beýan etdiler. Öz ýanlary bilen getiren haly önümlerini çitip, dokap, olara salan nagyşlary barada gürrüň berdiler. Gahryman Arkadagymyzyň «Arşyň nepisligi» atly kitaby esasynda halyçylyk sungatyny wasp etdiler.
