«Daşky gurşawy gorap saklamak ulgamynda ata-babalarymyzdan gelýän milli däp-dessurlarymyz bu günki gün has-da kämilleşdirilýär. Ata Watanymyzda her ýylda ählihalk bag ekmek çäreleriniň geçirilmegi ýurdumyzyň bagy-bossanlyga bürelmegine, halkymyzyň gözel tebigatymyza bolan söýgüsiniň artmagyna uly ýardam edýär» diýip nygtaýan Arkadagly Gahryman Serdarymyzyň parasatly ýolbaşçylygynda sagdynlygyň, ruhubelentligiň, bagtyýarlygyň mekany bolan Garaşsyz, hemişelik Bitarap Türkmenistanda raýatlaryň rahat, sagdyn, eşretli durmuşyny üpjün etmek, daşky gurşawy, gözel tebigatymyzyň arassalygyny gorap saklamak ugrunda ägirt uly işler amala aşyrylýar. Eziz Diýarymyzda her ýylyň ýaz hem-de güýz pasyllarynda köpçülikleýin bag nahallarynyň ekilmegi ýurdumyzyň tebigatynyň gözelligini artdyrmak bilen birlikde, ekologiýa abadançylyk derejesiniň ýokarlanmagyna hem uly täsirini ýetirýär. Berkarar döwletimizi bagy-bossanlyga öwürmek hem-de tokaý zolaklaryny döretmek boýunça giň gerimli maksatnamanyň üstünlikli durmuşa geçirilmeginiň tutuş daşky gurşawyň ekologiýa ýagdaýynyň gowulanmagynda, sagdyn durmuş ýörelgeleriniň rowaçlanmagynda diýseň ähmiýetlidigi bolsa öz-özünden düşnüklidir.
Berkarar döwletiň täze eýýamynyň Galkynyşy döwrüniň «Pähim-paýhas ummany Magtymguly Pyragy» ýylynda hem ýurdumyzyň ekologiýa abadançylygyny pugtalandyrmak ugrundaky işler dowamat-dowam bolýar. Muňa 1-nji martda hormatly Prezidentimiziň sanly ulgam arkaly geçiren Ministrler Kabinetiniň nobatdaky mejlisiniň barşynda hem aýdyň göz ýetirdik.