Milli medeniýetiň we sungatyň dabaralanmasy
Berkarar döwletiň täze eýýamynyň Galkynyşy döwründe, milli ruhly, döwrebap ösüşli medeniýetimiz, sungatymyz ýurdumyzda durmuşa geçirilýän beýik özgertmeleriň aýrylmaz bir bölegine öwrülip, jemgyýetiň ruhy bitewüligini kemala getiriji güýje eýe bolýar. Şonuň netijesinde hem, türkmen medeniýeti häzirki döwürde milli mirasy we jemgyýetiň häzirki zaman ösüşini özünde jemleýän döwlet durmuşynyň depginli ösýän ulgamyna öwrülýär. Eziz Watanymyzda milli medeniýetimiziň ruhy-ahlak, maddy we maddy däl gymmatlyklary, baý taryhy aýawly saklanylýar we asyl köklerimize daýanmak arkaly ösdürilýär, kämilleşdirilýär. Bu bolsa medeniýetimiziň, sungatymyzyň hiç bir halkyňka meňzemeýän milli aýratynlyklaryny, özboluşlylygyny ýüze çykaryp, dünýädäki abraýyny belende göterýär. Medeniýete, sungata uly sarpa goýýan Gahryman Arkadagymyzyň «Türkmen medeniýeti», «Medeniýet halkyň kalbydyr», «Ile döwlet geler bolsa...», «Parahatçylyk sazy, dostluk, doganlyk sazy» atly ajaýyp kitaplary medeniýet, sungat, döredijilik işgärleriniň ýankitabyna öwrüldi. Bu dürdäne kitaplarda manyly beýan edilýän täsirli wakalar, rowaýatlar esasynda, ýurdumyzyň teatrlarynda goýlan sahna eserleri, tomaşaçylaryň gyzgyn söýgüsine mynasyp boldy.