Şeýle bir dilewar kişiler bolýar, olaryň adaty bir wakany-da edil gyzykly eser ýaly edip gürrüň berşine haýran galyp oturmalydyr. Her birimiziň çagalyk günlerimiz baradaky ýatlamalarymyzyň içi-de şolar ýaly adamlaryň gyzykly gürrüňlerinden doludyr. Özüm-ä çagalygymy ýada salsam, gözümiň öňünde enemiň gürrüň berýän ertekilerindäki, rowaýatlaryndaky döw, jyn ýaly gahrymanlar hakydama gelýär.
Enemiň gürrüň berýän ertekileriniň, rowaýatlarynyň ýa-da beýleki wakalarynyň özboluşly tarapy, olaryň biri beýlekisine meňzemezdi. Şol bir ertekini birnäçe gün geçip, täzeden gürrüň beräýsin, içiniň wakalary üýtgeşiklikden doludyr. Indi-indi pikirlenip otursam, şol döwürler onuň huşy ejizläp ýören bolmaly. Ýöne ýyllaryň dowamynda kemala gelen, ussatlyk derejesine çykan dilewarlygy oňa bu syryny gizlinlikde saklamaga mümkinçilik bererdi.
