Köpetdagyň üljeleri
Ýurdumyzda üljeleriň 9 görnüşi bolup, olaryň 7-si ýabany ösümlik görnüşinde gabat gelýär. Üljäniň turşy ülje we adaty çereşnýa görnüşi medeni zolaklarda ösdürilip ýetişdirilýär. Üljeler bägülgüllüler (rosaceae) maşgalasyna degişlidirler. Gahryman Arkadagymyzyň «Türkmenistanyň dermanlyk ösümlikleri» atly ylmy kitabynda üljeleriň ýurdumyzyň çäginde ýaýran ýerleri, gory, himiki düzümi, peýdalanylyşy, ulanmagyň möhletleri we başga-da birnäçe maglumatlar doly beýan edilýär. Köpetdag döwlet tebigy goraghanasynyň meýdanlarynda üljeleriň 4 görnüşi — ownuk miweli ülje, Köpetdag üljesi, türkmen üljesi, gyzyl miweli ülje duş gelýär. Ownuk miweli üljäniň (Cerasus microcarpa (C.A.Mey.Boiss) boýy 2 — 2,5 metre ýetýär. Dagetek ýerlerde dagyň aşaky guşaklarynda, jülgelerde, ownuk daşly gaýalarda ösýär. Ol fewral aýlary gülläp başlaýar. Iýun — iýulda miweleýär. Goraghananyň Guryhowdan, Asylma, Uly Garaňky, Arçabil, Germap meýdançalarynda we oňa golaý dagetek ýerlerde üljeleriň ösüş ýagdaýyna gözegçilikler geçirildi. Ownuk miweli ülje ýylylygy we ýagtylygy halaýar, tohumy arkaly köpelýär.