Parahatçylygyň hem ynanyşmagyň ýolunda
Mälim bolşy ýaly, hormatly Prezidentimiz şu ýylyň 21-nji iýulynda Gyrgyz Respublikasynyň Çolpon-Ata şäherinde geçirilen Merkezi Aziýanyň döwlet Baştutanlarynyň dördünji konsultatiw duşuşygyna gatnaşdy. Konsultatiw duşuşyklar soňky ýyllarda Merkezi Aziýa döwletleriniň sebitde parahatçylygy, dost-doganlygy hem-de ynanyşmagy pugtalandyrmak ýaly maksatlarynyň bir bitewi ulgamyny emele getirdi. Şeýle duşuşyk geçen ýylyň 6-njy awgustynda Gahryman Arkadagymyzyň ýolbaşçylygynda Hazaryň kenaryndaky «Awaza» milli syýahatçylyk zolagynda üstünlikli geçirilipdi. Her ýylda geçirilmegi asylly däbe öwrülen bu duşuşygyň gerimi has-da giňeýär. Gadymy gyrgyz topragynda geçirilen bu gezekki konsultatiw duşuşyk hem baý many-mazmuna beslenip, ol netijeli we ygtybarly hyzmatdaşlygyň has-da pugtalandyrylmagynda möhüm ädimleriň biri boldy. Arkadagly Serdarymyzyň Merkezi Aziýanyň döwlet Baştutanlarynyň konsultatiw duşuşygynda çykyş edip, uzak geljegi nazarlaýan hem-de sebitde halklaryň bagtyýar, abadan durmuşyny üpjün etmäge gönükdirilen başlangyçlary öňe sürmegi ýurdumyzyň halkara abraýynyň barha arşa galýandygyny ýene-de bir gezek aýdyň görkezdi.