Göwün gözelligiň gözleginde. Gözellige aşyk göwün bolsa, «bahar meýlisinde seýrana çykylýan sähralar» kybap türkmen milli halylaryna, şol halylary on barmagynyň hünärine öwren türkmen gelin-gyzlarynyň milli lybaslarydyr şaý-seplerine maýyl. Göreni özüne maýyl edýän zenanlarymyzyň milli lybaslaryndaky özboluşly aýratynlyklarynyň biri-de, türkmen milli keşdeçilik sungatydyr. Ine, bu gün bolsa Arkadagly Serdarymyzyň parasatly baştutanlygynda «Türkmen keşdeçilik sungaty» dünýä derejesinde dabaralandyrylyp, ÝUNESKO-nyň Adamzadyň maddy däl medeni mirasynyň sanawyna goşuldy.
Pasyllar hem ýyllar ornuny çalşyp, asyrlar aşsa-da, döwür üýtgese-de, gelin-gyzlarymyzyň aýratynlygyny, özboluşlylygyny, agraslygyny hem eli çeperligini şöhlelendirýän türkmen zenanlarynyň lybaslary öz gymmatyny gaçyrman gelýär. Gelin-gyzlarymyzyň milli lybaslarynyň öz taryhyny gadymy döwürlerden alyp gaýdýandygyna Türkmenistanyň çäginden tapylan gadymy zenan heýkeljiklerindäki uzyn köýnekler hem şaýatlyk edýär. Bellärlikli aýratynlyklaryň biri-de, gelin-gyzlarymyzyň geýýän köýnekleriniň matasyny özleriniň dokamagy, şeýle-de olara zenanlarymyzyň filosofiki pikirlerini özüne siňdiren nepis nagyşlaryň salynmagydyr. Bu barada Gahryman Arkadagymyz halkymyza peşgeş beren «Türkmen medeniýeti» atly kitabynda: «Öý şertlerinde tikin-çatyn işlerini ýerine ýetirmegi başarmak gelin-gyzlaryň görki-gelşigi, edep-ekramydyr. Asyllylygyň, başarjaňlygyň, maksada okgunlylygyň nyşanydyr. Gaýmany, keşdäni, göldür nagşy döredip, dünýäni haýran eden türkmen zenanynyň on barmagynyň gudratyndan kemal tapan çeper el işleri bolsa ýöne bir senet däldir, ol sungatdyr, kerem-keramatdyr!» diýip belleýär.