Mähriban ene-mamalarymyzyň sungat derejesine ýetiren çeper el işleriniň, hünäriniň miwesi bolan alajanyň nämedigini bilmeýän ýok bolsa gerek. Alaja akly-garaly sapaklardan örülen ýa-da işilen sapak bag bolup, gelin-gyzlarymyz el işlerinde oňa aýratyn orun beripdirler. Eli çeper, dili şeker gelin-gyzlarymyzyň çekýän keşdelerinde, dokaýan halylarynda, dürli nagyşlarynda alajanyň şekiline hemişe gabat gelmek bolýar. Alajany dürli görnüşli, reňkli sapaklary goşup örüp, togalak we ýasy görnüşde taýýarlamagy başaran ene-mamalarymyz, gelin-gyzlarymyz gözden-dilden gorasyn diýip, onuň has inçeden nepis örülenlerini çagajyklaryň ellerine, boýunlaryna we düşejikleriniň gyralaryna dakypdyrlar. Ýasy görnüşde taýýarlanan alajany bolsa täze doglan bäbejigi gundamak, şeýle-de sallançak bagy üçin ulanypdyrlar. Alajany gözden-dilden goraýan mukaddes zat hökmünde kabul eden ene-mamalarymyz ony diňe bir çagalaryna, öýlerine, el işlerine dakmak bilen çäklenmän, eýsem, köşejiklerdir taýjagazlaryň-da boýnuna dakypdyrlar.
Gahryman Arkadagymyzyň «Türkmeniň döwletlilik ýörelgesi» atly ajaýyp kitabynyň «Saglyk — abatlyk» atly bölümindäki: «Biziň halkymyzda dagdan, düýe ýüňi, alaja ýaly zatlar ýakymsyz täsirlerden, gözden-dilden goraglylygy aňladýar», şeýle-de: «Gadymy döwürlerde-de ak öýleriň dulunda alaja ýüp germelip, şoňa kilim atylyp, sallançak edilipdir» diýen setirleri okanyňda alajany ene-mamalarymyzyň mukaddeslik derejesine ýetirip, tumar hökmünde eý görüp gelendiklerine göz ýetirýärsiň. Alaja bilen baglanyşykly il arasyndan eşiden şu rowaýatymyz okyjylary biparh goýmasa gerek.