Türkmenistanyň Döwlet medeniýet merkeziniň Döwlet muzeýinde Amerikanyň Birleşen Ştatlarynyň Döwlet müdirliginiň «Medeni mirasy gorap saklamak baradaky Ilçileriň gaznasy» atly maksatnamasynyň çäklerinde 2021-nji ýyl üçin yglan edilen bäsleşikde muzeýiň hödürlän taslamasy, ýagny Buddany şekillendirýän monumental gadymy heýkeli rejelemek boýunça taslamanyň saýlanandygy mynasybetli dabara geçirildi.
Bu heýkel 1960 — 1978-nji ýyllarda Günorta Türkmenistan arheologiýa toplumlaýyn ekspedisiýasynyň agzalary tarapyndan «Gadymy Merw» taryhy-medeni döwlet goraghanasynyň çäginde ýerleşýän Gäwür gala ýadygärliginden tapylypdyr. Şondan bäri bu heýkel muzeýiň gaznasynda saklanylýar. Dabarada çykyş edenler türkmen-amerikan medeni hyzmatdaşlygynyň barha giň gerime eýe bolýandygyny, iki dostlukly halkyň hünärmenleriniň şeýle iri göwrümli taslamalary amala aşyrmaga işeňňir gatnaşýanlygyny buýsanç bilen bellediler.
