Mekdep okuwçylarynyň tomusky dynç alyş möwsümi dowam edýär. Kaka etrabynyň çäginde ýerleşýän «Ýaşyl ýaýla» çagalar dynç alyş we sagaldyş merkezinde çagalaryň 150-si tomus möwsümini ruhubelentlik bilen geçirýärler. Onda 7 – 14 ýaş aralygyndaky çagalar dynç alýar.
Merkezde çagalar toparynyň dördüsi bolup, olara on iki sany pedagog mugallym gözegçilik edýär. Bu ýerde möwsümiň tapgyrlary boýunça ýörite meýilnamalar taýýarlanyldy. Sport ýaryşlary, çeper döredijilik, aýdym-saz, asfaltda surat çekmek ýaly bäsleşiklere çagalar uly höwes bilen gatnaşýarlar, küşt, şaşka, düzzüm ýaly oýunlar bilen meşgullanýarlar. Merkezde çagalar üçin niýetlenen ýörite kitaphana hem bar. Bu ýerde çagalar edebiýatyna degişli bolan ertekiler, hekaýalar, goşgular toplumy, tapmaçalar bilen bagly kitaplar bar. Esasy bellenilmeli ýagdaý, bu ýerde gurnaklar hem döredildi, ýagny çeper eller, diller dünýäsi, suratkeşlik, ekologiýa gurnaklary hereket edýär. Bu ýerde çagalar öz isleg bildiren gurnaklaryna gatnaşýarlar. Öz başarnyklaryny kämilleşdirýärler. Mundan başga-da, oýun we sport zallarynda çagalar wagtlaryny şadyýan oýunlar bilen geçirýärler.
