Ýaş nesle bilim bermek bilen bir hatarda, olara edep-terbiýe bermegiň hem zerurlygy hökmandyr. Mugallym okadýan her sapagyny terbiýe bilen utgaşykly alyp barmalydyr. Şonda hakyky kämil şahsyýeti kemala getirmek mümkindir. Bu bolsa mugallymlaryň döredijilikli zähmetine bagly bolup durýar.
Bilşimiz ýaly, umumybilim edaralarynda okadylýan her bir dersiň öz many-mazmuny bolup, olar ýaş nesliň bilim alyp kämilleşmeginde aýratyn orna eýe bolup durýar. Şunda başlangyç synplarda okadylýan ýaşaýyş-durmuş esaslary dersinde çagalara milli terbiýe medeniýetli bolmagyň ilkinji basgançaklary öwredilýär. Çagalaryň edepli-terbiýeli bolmagy her bir ene-atanyň göwün küýsegidir. Şonuň üçin olar çagalarynyň ýokary adamkärçilikli sypatlarda kemala gelmegini isläp, olary okadýan mugallymlara uly ynam bildirýärler. Şeýle möhüm wezipäni üstünlikli amala aşyrmakda biz — mugallymlar hem okatmagyň netijeli usullaryndan peýdalanmaga çalyşýarys. Bu bolsa çagalaryň köpçülikde, ýekelikde, mekdepde özlerini alyp baryşlarynda aýdyň ýüze çykýar. Ýaşaýyş-durmuş esaslary dersi hem çagalarda kiçilikden zerur bolan oňat häsiýetleri kemala getirmekde aýratyn orna eýe bolup durýar.