Berkarar döwletimiziň bagtyýarlyk döwründe alnyp barylýan ylym, bilim syýasaty yzygiderli kämilleşdirilýär. Milli ylym-bilim ulgamyny ösdürmäge, hususan-da, döwrebap bilimli, giň dünýägaraýyşly, ýokary hünärli, täzeçe pikirlenýän alymlaryň neslini terbiýeläp ýetişdirmäge, bu ugurda halkara hyzmatdaşlygy ösdürmäge gönükdirilen işler barha ýaýbaňlanýar.
Hormatly Prezidentimiziň tagallasy bilen her ýylda 1-nji synpa barýan körpelere öwrediji kompýuterleriň sowgat berilmegi ösüp gelýän ýaş nesli bilim we terbiýe bermegiň ilkinji günlerinden başlap, sanly ulgamlaryň jadyly dünýäsine aralaşdyrmaga, olaryň mümkinçiligine görä, sanly ulgamlarda belli bir amallarydyr döwrebap guramaçylyk tehnikalary bilen iş salyşmagy öwretmäge amatly şertleri döredýär. Her bir synp otagynyň interaktiw tagtalar we multimedia enjamlary bilen üpjün edilmegi, mekdep okuwçylaryna öwredilýän her bir sapagyň audiowizual, ýagny eşitdirip hem-de görkezme esbaplarydyr tehniki serişdeler bilen utgaşdyrylmagy berilýän bilimiň hiliniň ýokary bolmagyna, ýetirilýän maglumatyň okuwçylaryň ýadynda galmagyna getirýär.
