Hormatly Prezidentimiziň parasatly baştutanlygynda berkarar Diýarymyzyň bilim ulgamy uly ösüşlere eýe boldy. Ýurdumyzyň bilim edaralarynda giň gerimli özgertmeleriň durmuşa geçirilmegi, ýörite orta hünär we ýokary okuw mekdeplerinde bilim alýan talyplaryň sanynyň artdyrylmagy, olary tamamlan ýaş hünärmenleriň döredijilikli zähmet çekmekleri üçin döredilýän giň möçberli şertler halk hojalygynyň ähli ugurlarynda işleriň örän çalt depginlerde öňe ilerlemegine ýardam edýär. Şunda bilim ulgamynyň maddy-enjamlaýyn binýadynyň pugtalandyrylmagy, okatmagyň täze tehnologiýalar arkaly baýlaşdyrylmagy, usulyýetiň kämilleşdirilmegi, sanly bilim ulgamyna geçilmegi we täze okuw merkezleriniň açylmagy bilen, gysga döwrüň içinde, gazanylan üstünlikler biz — ýaşlar üçin aýratyn buýsandyryjydyr. Biz — ýaşlar hormatly Arkadagymyzyň okamak, öwrenmek üçin döredip berýän giň mümkinçiliklerinden we şertlerinden peýdalanyp, barha kämilleşýän bilim ulgamynda bilimimizi çuňňur özleşdirmäge çalyşýarys.
Hormatly Prezidentimiziň: «Güýçli döwletde ylym esasy orny eýeleýär. Diýmek, biz ylmyň iň täze gazananlary bilen aýakdaş gitmelidiris» diýen çuň parasatly sözleri ylym-bilim ulgamynyň ösüşinde baş ýörelge bolup durýar. Şunda sanly ulgam, ylym, täze tehnologiýalara daýanýan ykdysadyýet ýurdumyzyň beýik ösüşlerine kuwwatly itergi berýär. Iň täze maglumat we kompýuter tehnologiýalaryny, interaktiw usuly hem-de aragatnaşyk serişdelerini, şol sanda interneti we internet ulgamyny ulanmak bilen guralýan elektron okuwlaryň gerimi has-da giňeldi.
