Ýurdumyzda hereket edýän «Türkmenistanda daşary ýurt dillerini okatmagy kämilleşdirmegiň Konsepsiýasy» bilim-terbiýeçilik işini yzygider ösdürmegiň aýdyň ýollaryny salgy berýär. Bu resminamada hemmetaraplaýyn ösen, döwrebap ylymlardan baş çykarýan hünärmenleri taýýarlamakda okatmagyň, bilim bermegiň has täze, dünýä ülňülerine laýyk gelýän usullaryndan peýdalanmagyň zerurlygy aýdylýar.
Bilim-terbiýeçilik edaralarynda okatmagyň interaktiw — özara içerki işjeňlik usulynyň ýola goýulmagy, ösen tehnologiýalar esasynda ýaş nesliň dünýägaraýşyny, pikirlenmek ukyplaryny, mesele çözmek başarnyklaryny, başgalaryň pikirleri boýunça özüňe baha berip bilmek endiklerini kämilleşdirýär. Bu usul ýaş nesliň örän çalt depginlerde ösýän we täze tehnologiýalaryň kämilleşýän dünýäsinde wajyp orny eýeleýändiklerine hem-de bu ösüşlere gönüden-göni gatnaşykda bolýandyklaryna düşünmeklerine ýardam edýär.