Berkarar döwletiň bagtyýarlyk döwründe milli bilim ulgamynda alnyp barylýan işleriň netijeliligini ýokarlandyrmak, ösüp barýan ýaş nesillere berilýän bilimiň we terbiýäniň hilini gowulandyrmak babatda möhüm işler durmuşa geçirilýär. Ýurdumyzyň çäginde ýaýbaňlandyrylan bilim özgertmeleri umumybilim berýän edaralarda okuw-terbiýeçilik işini dünýä ülňülerine laýyk kämilleşdirmek bilen bir hatarda, ulgamyň dolandyryş düzümini, hukuk binýadyny döwrebaplaşdyrmak esasynda utgaşykly alnyp barylýar. Bu işler hormatly Prezidentimiziň Karary bilen tassyklanan «Türkmenistanda sanly bilim ulgamyny ösdürmegiň Konsepsiýasyna» laýyklykda tapgyrlaýyn esasda durmuşa geçirilýär. «Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Maksatnamasyna» laýyklykda, bilim ulgamynda durmuşa geçirilýän özgertmeler milli ýörelgelere we dünýäniň ösen tejribesine daýanýar, okuw maksatnamalarynyň, kitaplaryň, gollanmalaryň mazmuny we ylmy-usulyýet ugurlary kämilleşdirilýär. «Türkmenistanda çaganyň irki ösüşini we olaryň mekdebe taýýarlygyny ösdürmek babatda 2020 — 2025-nji ýyllarda mekdebe çenli çagalar edaralarynyň işini kämilleşdirmegiň Maksatnamasynyň», «Türkmenistanda tebigy we takyk ylmy ugurlara degişli dersleri okatmagy kämilleşdirmegiň Konsepsiýasynyň» tassyklanylmagy hem ýurdumyzda ýaş nesilleriň bilim-terbiýe meselesine uly üns berilýändigini alamatlandyrýar.
Hormatly Prezidentimiziň tagallasy bilen, Bilim ministrliginiň Innowasiýa maglumat merkeziniň döredilmegi hem sanly ulgamyň durmuşymyza barha giňden ornaşdyrylýandygynyň aýdyň güwäsidir. Sanly bilim ulgamyny ösdürmegiň çäklerinde bilim we terbiýeçilik işlerine okatmagyň öňdebaryjy usullary, ylmyň gazananlary, innowasion tehnologiýalar giňden ornaşdyrylýar. Bilim edaralarynyň resmi web-saýtlaryny we elektron resminama dolanyşygy ulgamyny döretmek boýunça netijeli işler alnyp barylýar.
